برطانیہ کے لیے ای ویزا، پاکستانی شہریوں کو بڑی سہولت مل گئی

اسلام آباد (نیوز ڈیسک) — پاکستانی شہریوں کے لیے برطانیہ کے سفر سے متعلق ایک اہم سہولت متعارف کرا دی گئی ہے،
جس کے تحت اب وہ ’’ای ویزا‘‘ نظام سے فائدہ اٹھا سکیں گے۔ اعلامیے کے مطابق سیاحت یا کاروباری مقاصد کے لیے برطانیہ جانے والے افراد کو اب پاسپورٹ پر ویزا اسٹیکر لگوانے کی ضرورت نہیں ہوگی۔ ویزا کی منظوری ای میل کے ذریعے موصول ہوگی اور درخواست دہندگان کو ڈیجیٹل ریکارڈ کی صورت میں ای ویزا جاری کیا جائے گا۔ یہ سہولت برطانوی ہائی کمیشن نے فراہم کی ہے، جبکہ ای ویزا کو یو کے ویزا اینڈ امیگریشن کے آن لائن اکاؤنٹ کے ذریعے حاصل کیا جا سکے گا۔ حکام کا کہنا ہے کہ نئی پالیسی کے بعد پاسپورٹ واپس لینے کے لیے ویزا سینٹر کا دوبارہ دورہ کرنے کی ضرورت نہیں رہے گی۔ درخواست گزار ’’شیئر کوڈ‘‘ تیار کر کے کسی بھی بارڈر پر اپنے ویزے کی تصدیق کرا سکیں گے۔ البتہ ویزا کے طریقہ کار، اہلیت یا شرائط میں کوئی رد و بدل نہیں کیا گیا۔

جین میریٹ نے اس پیش رفت کو پاکستانی شہریوں کے لیے ایک بڑی سہولت قرار دیتے ہوئے کہا کہ اس اقدام سے ویزا عمل مزید آسان اور جدید ہو جائے گا۔