سرکاری اسپتال میں پیدائش پر نومولود کو سونے کی انگوٹھی دینے کا اعلان

بھارت کی ریاست تمل ناڈو کی حکومت نے ماؤں اور نومولود بچوں کی صحت کے فروغ کے لیے ایک نئی فلاحی اسکیم متعارف کرا دی ہے۔ بھارتی میڈیا رپورٹس کے مطابق اس منصوبے کے تحت سرکاری اسپتالوں میں پیدا ہونے والے ہر نومولود بچے کو ایک گرام سونے کی انگوٹھی بطور تحفہ دی جائے گی۔

حکام کا کہنا ہے کہ اس اقدام کا مقصد عوام کو سرکاری اسپتالوں میں محفوظ زچگی کی سہولتوں کی طرف راغب کرنا، طبی خدمات پر اعتماد بڑھانا اور کم آمدنی والے خاندانوں کی حوصلہ افزائی کرنا ہے۔

حکومت نے اس منصوبے کے لیے سالانہ بجٹ بھی مختص کیا ہے، جبکہ اعلان کیا گیا ہے کہ 22 جون 2026 یا اس کے بعد سرکاری اسپتالوں میں پیدا ہونے والے بچے اس اسکیم سے فائدہ اٹھا سکیں گے۔

ریاستی حکام کے مطابق یہ منصوبہ ماؤں اور بچوں کی بہتر صحت، تحفظ اور فلاح کے لیے شروع کیے جانے والے وسیع تر پروگرام کا حصہ ہے۔